Örnám (e. microcredentials) eru stuttar námslínur á háskólastigi. Sérstaða örnáms er að námið er metið á grunni ECTS eininga og lýtur því öllum þeim gæðakröfum sem gerðar eru til náms á háskólastigi hvað færni og þekkingu varðar. Örnámið við Háskólann á Bifröst er kennt í fjarnámi og hentar því afar vel meðfram vinnu og öðru námi. Örnám má meta til styttingar grunn- eða meistaranáms eða til inntöku í nám á meistarastigi.
Örnám hefur vaxið hratt í Evrópu á undanförnum árum. Það er ekki síst vegna krafna atvinnulífs og einstaklinga um hæfniþróun og möguleika á endurmenntun í formi styttri námleiða. Þróun örnáms er í takti við kröfur um aukinn sveigjanleika í námi. Örnám býður upp á fleiri möguleika fyrir fólk sem langar að spreyta sig á nýju háskólanámi eða fyrir þá sem uppfylla ekki skilyrði til menntunar á háskólastigi.
Áætlað er að helmingur núverandi starfa í atvinnulífinu muni breytast eða jafnvel hverfa á næstu árum. Um 65% nemenda í grunnskólum í dag munu í framtíðinni vinna við störf sem enn eru ekki til. Spár segja einnig að þriðjungur þeirrar færni sem í dag er mikil eftirspurn eftir, verði næstum óþörf eftir þrjú ár.