Grunnnám í miðlun og almannatengslum er einstakt BA-nám hér á landi. Námið miðar að því að búa nemendur undir þátttöku á vinnumarkaði sem gerir æ ríkari kröfur um þekkingu og fagleg vinnubrögð er lúta að samskiptum við fjölmiðla, fyrirtæki, einstaklinga og stofnanir.
Námi í miðlun og almennatengslum byggir á félagsvísindum, veitir nemendum skilning á hlutverki fjölmiðla í samfélaginu og undirbýr þá til að takast á við síbreytilegt fjölmiðlaumhverfi með auknum upplýsinga-, boðskipta- og miðlunarleiðum sem eykur flæði upplýsinga en ýtir á sama tíma undir samkeppni um athygli. Með almannatengslum öðlast nemendur færni í að byggja upp traust og skapa langvarandi sambönd og getu til að miðla stefnumótandi skilaboðum við ýmsar aðstæður.
Námið er tilvalið fyrir einstaklinga sem hafa hug á að vinna við samskipti og miðlun upplýsinga, hvort sem er á sviði fjölmiðlunar eða sem upplýsingafulltrúar, almannatenglar, ráðgjafar eða samskiptastjórar. Breiður grunnur námsins gerir nemendum kleift að takast á við fjölbreytt störf á margvíslegum starfsvettvangi. Sem dæmi má nefna störf á samskipta- eða markaðssviðum skipulagsheilda, á almannatengsla-, markaðs- og auglýsingastofum, eða hjá opinberum stofnunum og samtökum af ýmsum toga. Samfélagsleg þörf fyrir menntun á þessu sviði hefur aldrei verið meiri þar sem við stöndum frammi fyrir brýnum áskorunum þegar kemur að upplýsingaóreiðu og falsfréttum, varðveislu tjáningarfrelsis og lýðræðislegu hlutverki fjölmiðla.
Fagstjóri námslínunnar er Andrea Guðmundsdóttir.
-
Einstakt nám
Námið, sem er til 180 ECTS eininga, byggir á 60 ECTS eininga grunni hug- og félagsvísinda þar sem nemendur byggja upp almennan þekkingargrunn á samfélags- og stjórnmálum og hæfni til þess að greina og vinna með hugmyndir á gagnrýninn og siðferðislegan hátt. Í þessum hluta taka nemendur meðal annars námskeið í stjórnmálum, samfélagslegri ábyrgð, loftslagsáhrifum, og í kynja- og fjölbreytileikafræðum.
Nemendur taka svo 48 ECTS eininga kjarnanámskeið í miðlun og almannatengslum þar sem þeir læra um samspil fjölmiðla og samfélagsins og hlutverk almannatengsla. Námið hefur bæði hagnýtar og fræðilegar hliðar þar sem nemendur eru þjálfaðir í stefnumótandi hugsun í framsetningu og miðlun hugmynda með hliðsjón af ólíkum markhópum, en fá einnig kennslu í fjölmiðlafærni, bæði í framkomu og skrifum.
Þá hafa nemendur 42 ECTS eininga val, þar sem þeim gefst kostur á að velja námskeið á eigin áhugasviði, s.s. í markaðs- og stjórnunarfræðum og félagsvísindagreinum. Nemendur eru stöðugt hvattir til að þjálfa og þroska sjálfstæða hugsun og nýta sér námið til þess.
-
Lærðu heima
Háskólinn á Bifröst er í fararbroddi í fjarnámi, sem gerir þér kleift að vera í námi við HB á þínum forsendum. Áhersla er lögð á einstaklingsbundna nálgun og námsumhverfi er stafrænt og sveigjanlegt. Stafrænt fjarnám er þannig frábær valkostur fyrir fólk sem hentar að vera í sveigjanlegu háskólanámi, vegna vinnu með námi eða af einhverjum allt öðrum ástæðum. Nánar um námið við Háskólann á Bifröst
-
Fyrirkomulag kennslunnar
Við Háskólann á Bifröst er áhersla lögð á persónulega þjónustu til nemenda. Ánægjukannanir sýna að mikill meirihluti nemenda er afar ánægður með námið og samskipti við kennara og starfsfólk.
Hverri önn við Háskólann á Bifröst er skipt upp í tvær lotur. Verkefnavinna er stór þáttur í námsmati háskólans og vinna nemendur að verkefnum jafnt og þétt yfir lotur skólaársins.
Sjö vikur eru í hvorri lotu og ein staðlota, þar sem nemendur hitta kennara og samnemendur og taka þátt í umræðum og hópverkefnum. Önnur sérstaða í kennsluháttum Háskólans á Bifröst eru misserisverkefni eða missó, eins og verkefnin eru gjarnan nefnd. Missó tekur mið af á kennsluaðferð sem kallast lærdómsþróun (e. learning by developing) og miðar að því að auka hæfni nemenda fyrir vinnumarkað að námi loknu. Nánar um námið á Bifröst
-
Framvinda og námslok
Grunnnám við Háskólann á Bifröst er 180 ECTS fjarnám og geta nemendur að verulegu leyti ráðið námshraða sínum.
Jafnframt gefst kostur á því að ljúka flestu grunnnámi á tveimur og hálfu ári. Sumarönn er kennd við Háskólann á Bifröst og nemdur geta því lokið 80 ECTS einingum á ári í stað 60. Námskeiðum má þannig að mestu leyti ljúka á fyrstu tveimur námsárunum. Á þriðja ári gera nemendur svo lokaverkefni auk þess að ljúka einingum sem kunna að vera eftir vegna starfsþjálfunar eða valnámskeiða.
-
Inntökuskilyrði
Til að geta innritast í námið þurfa nemendur að hafa lokið stúdentsprófi eða sambærilegri menntun t.d. úr Háskólagátt Háskólans á Bifröst.
Forgangsröðun við inntöku nemenda ræðst af einkunnum.
-
Umsóknarfrestur
Ekki er tekið við umsókum fyrir vorönn 2025. Umsóknarfrestur vegna náms á haustönn 2025 er til 5. júní.
Opnað verður fyrir umsóknir vegna haustannar þann 1. mars 2025.