Markmið námsins er að veita nemendum þann grunn og þjálfun í stefnumótun, stjórnun og rekstri sem nauðsynlegur er í menningarumhverfi samtímans. Háskólinn á Bifröst er eini háskólinn hér á landi sem býður upp á þessa samsetningu náms og reynslan hefur sýnt að nemendur sem útskrifast með meistaragráðu í menningarstjórnun frá Bifröst eru eftirsóttir starfskraftar og samstarfsmenn á sviði menningar- og menntastjórnunar. Taka má menningarstjórnun til MA gráðu eða MCM gráðu.
- MA gráða er 90 eininga nám á meistarastigi: Námskeið (60 ECTS) og MA ritgerð (30 ECTS).
- MCM gráða er 90 eininga nám á meistarastigi án lokaritgerðar: Námskeið (78 ECTS) og lokaverkefni (12 ECTS).
Nám í menningarstjórnun býr nemendur undir viðamikil og oft vandasöm störf á menningar- og menntasviðinu. Námið hefur verið í boði frá árinu 2004 og er mótað með hliðsjón af íslensku og alþjóðlegu menningarumhverfi og þeim áskorunum sem bíða nemenda eftir að námi lýkur.
Meistaranemum í menningarstjórnun stendur til boða á sumarönn 2024 að taka þátt í námskeiðinu Rannsóknir á sviði menningar og skapandi greina í landsbyggðum sér að kostnaðarlausu.
-
Einstakt nám
Bifröst hefur boðið upp á nám í menningarstjórnun síðan árið 2004 og er eini íslenski háskólinn til þess. Námið hefur slípast með árunum og mótast í samræmi við íslenskt menningarumhverfi og þær áskoranir sem bíða nemenda eftir að námi lýkur. Þar sem námið byggir jafnt á fræðilegri og hagnýtri nálgun gefur það nemendum kost á að vinna með og þróa gagnrýna sýn á menningu og menningarpólitík, um leið og þeir öðlast hagnýta þjálfun sem lýtur að rekstri, stjórnun og skipulagningu. Umsjón með námslínunni hefur dr. Njörður Sigurjónsson, prófessor.
-
Lærðu heima
Háskólinn á Bifröst er í fararbroddi í fjarnámi, sem gerir þér kleift að vera í námi á þínum forsendum. Áhersla er lögð á einstaklingsbundna nálgun og námsumhverfi er stafrænt og sveigjanlegt. Stafrænt fjarnám er þannig frábær valkostur fyrir fólk sem hentar að vera í sveigjanlegu háskólanámi, vegna vinnu með námi eða af einhverjum allt öðrum ástæðum. Nánar um námið við Háskólann á Bifröst
-
Framvinda og námslok
Námið er 90 einingar á meistarastigi í fjarnámi og er unnt að ljúka náminu á þremur önnum.
Allir nemendur ljúka fimm kjarnanámskeiðum auk þriggja skyldunámskeiða sem bundin eru við hvora áherslulínu um sig og tveggja valfaga sem í boði eru hverju sinni. Nemandi í fullu námi hefur jafnan vinnu við MA verkefni á annari önn og lýkur henni á þeirri þriðju með einu eða tveimur námskeiðum. Meistararverkefni eru varin formlega frammi fyrir prófdómurum.
-
Inntökuskilyrði
Inntökuskilyrði í námið er grunngráða háskólanáms (t.d. BS, BA, B.Ed eða BFA) eða menntun og reynsla sem telja má sambærilega við grunngráðu í háskóla, sem að jafnaði hefur verið lokið með 7,25 í einkunn eða jafngildi þess. Þeir sem ljúka námi fá MA gráðu í menningarstjórnun sem jafngildir meistaraprófi (stig 2.2) samkvæmt viðmiðum Mennta- og menningarmálaráðuneytisins um æðri menntun og prófgráður 2011.
-
Umsóknarfrestur
Ekki er tekið við umsókum fyrir vorönn 2025. Umsóknarfrestur vegna náms á haustönn 2025 er til 5. júní.
Opnað verður fyrir umsóknir vegna haustannar þann 1. mars 2025.