Meistaranám í fjármálastjórnun er nýtt nám sem verður í boði frá og með hausti 2026.
Námið er 120 eininga MSc-gráða, eða 90 eininga MFM gráða sem kennt er í fjarnámi. Námið er hannað fyrir þau sem vilja skilja hvernig fjárhagsleg ákvörðunartaka hefur áhrif á rekstur, samfélag og hagkerfi. Í náminu sameinast fræðileg dýpt og raunveruleg viðfangsefni úr atvinnulífinu.
Nemendur fá þjálfun í greiningu ársreikninga, fjárfestingum, áhættustýringu og stefnumótun. Lögð er áhersla á að nemendur skilji bæði fræðilega og hagræna rökhugsun sem liggur að baki fjármálakerfinu og öðlist færni til að beita þeirri þekkingu í framkvæmd.
Námið hentar þeim sem hafa áhuga á fjármálum, hagfræði og stefnumótun fyrirtækja og vilja byggja upp traustan grunn fyrir störf í rekstri, fjármálum eða ráðgjöf, eða sem vilja undirbúa sig fyrir frekara nám. Það er góður grunnur fyrir þau sem vilja byggja upp faglega þekkingu á fjármálum og skilja hvernig verðmæti verða til.
Þekkingin sem námið veitir er alþjóðlega viðurkennd og nýtist jafnt í íslensku atvinnulífi sem og erlendis.
Fagstjóri námsins er Erlendur Ingi Jónsson
-
Fjarnám
Háskólinn á Bifröst er í fararbroddi í fjarnámi, sem gerir þér kleift að vera í námi á þínum forsendum í stafrænu námsumhverfi. Stafrænt fjarnám er þannig frábær valkostur fyrir fólk sem hentar að vera í sveigjanlegu háskólanámi, vegna vinnu með námi eða af einhverjum allt öðrum ástæðum. Samhliða þessu leggur skólinn einnig áherslu á búa til samfélag nemenda og í því tilliti sinna nemendur hópverkefnum og koma saman í staðalotum þar sem nemendur búa til tengsl við samnemendur sína og kennara.
-
Inntökuskilyrði meistaranáms
Inntökuskilyrði í meistaranám í fjármálastjórnun er grunngráða í viðskiptafræði, hagfræði eða STEM greinum með fyrstu einkunn 7,25. Forgangsröðun við inntöku nemenda ræðst af einkunnum og verða að hámarki teknir inn 40 nemendur skólarárið 2026-2027
-
Skipulag námsins
Hvert námskeið í stafrænu námi er allajafna kennt í 7 vikna lotum (tvö námskeið eru kennd yfir tvær lotur) og í hverju námskeiði er ein staðlota á Hvanneyri eða í Borgarnesi. Í öllum námskeiðum liggja fyrir ákveðin þekkingar-, leikni- og hæfnimarkmið. Lögð eru fyrir verkefni jafnt og þétt sem þjálfa nemendur í að öðlast þá leikni og hæfni sem stefnt er að í hverju námskeiði fyrir sig.
Á staðlotum fer fram verkefnavinna og umræður með kennara. Gert er ráð fyrir talsverðri verkefnavinnu í hverju námskeiði og lögð er áhersla á hópa- og teymisvinnu í verkefnum. Skipulag fjarnámsins er þannig að fyrirlestrar og kennsluefni í hverju námskeiði er aðgengilegt nemendum á fjarnámsvef háskólans og nemendur geta þannig skipulagt tíma sinn eins og þeim hentar best. -
Umsóknarfrestur
Umsóknarfrestur fyrir skólaárið 2026-2027 er til og með 5. júní 2026.
-
Lærðu heima
Háskólinn á Bifröst er í fararbroddi í fjarnámi, sem gerir þér kleift að vera í námi á þínum forsendum í stafrænu námsumhverfi. Stafrænt fjarnám er þannig frábær valkostur fyrir fólk sem hentar að vera í sveigjanlegu háskólanámi, vegna vinnu með námi eða af einhverjum allt öðrum ástæðum. Samhliða þessu leggur skólinn einnig áherslu á að búa til samfélag nemenda og í því tilliti sinna nemendur hópverkefnum og koma saman í staðalotum þar sem nemendur búa til tengsl við samnemendur sína og kennara.