Grunnnám í viðskiptafræði við Háskólann á Bifröst er alhliða viðskiptanám sem ætlað er að búa nemendur undir ábyrgðar-, forystu- og stjórnunarstörf í atvinnulífinu. Boðið er upp á allar helstu greinar viðskiptafræðinnar, þ.e. fjármál, hagfræði, stjórnun og markaðsmál, auk almennra námsgreina. Námið er á íslensku en nemendur geta dvalið eina önn í skiptinámi við erlendan samstarfsháskóla.

Viðskiptafræðin er í boði bæði í staðnámi og í fjarnámi.

Í staðnámi er hefðbundið viðskiptafræðinám.

Í fjarnámi eru þrjár námslínur í boði:

• BS nám í viðskiptafræði
• BS nám í viðskiptafræði með áherlsu á markaðssamskipti
• BS nám í viðskiptafræði með áherslu á ferðaþjónustu

Í staðnáminu eru sumarannir auk hefðbundinna haust- og voranna, sem þýðir að nemendur geta lokið BS námi á tveimur og hálfu ári. Í fjarnámi er námið skipulagt sem 3ja ára nám. Nemendum í fjarnámi býðst þó einnig að taka sumarnámskeið í staðnámi. Öflugur fjarnámsbúnaður gerir nemendum kleift að stunda fjarnám í viðskiptafræði hvar sem er. Fyrirlestrar eru aðgengilegir á vef skólans og geta nemendur nálgast þá þegar þeim hentar og hlustað á þá í tölvunni eða hlaðið þeim niður á WMV eða Ipod, eftir því hvað hentar hverjum og einum.

Í hverju fjarnámskeiði er vinnuhelgi og eru þær mikilvægur þáttur í fjarnáminu á Bifröst. Þær eru notaðar til fyrirlestra, verkefnavinnu og samskiptaþjálfunar. Mikil áhersla er lögð á að nemendur hagi skipulagi sínu þannig að þeir geti mætt á vinnuhelgar og tekið fullan þátt í kynningum, gagnrýnni umræðu og öðru sem fram fer.

Í öllu námi á Bifröst er lögð rík áhersla á að nemendur geti annars vegar unnið sjálfstætt að úrlausn krefjandi verkefna og hins vegar unnið í hópi samnemenda að rannsóknum og úrlausnum stærri verkefna, kynnt þau og lagt í dóm kennara og samnemenda. Lögð er áhersla á gagnrýna hugsun og hagnýta tengingu við raunhæf verkefni sem eru fleiri og umfangsmeiri en almennt gerist við háskóla hér á landi.

Sérstaða í kennsluháttum Bifrastar felst meðal annars í svokölluðum misserisverkefnum sem unnin eru í 4-6 manna hópum. Nemendur eiga að vinna þrjú slík verkefni á námstímanum. Verkefnin eru oft unnin í samvinnu við fyrirtæki, sveitarstjórnir, opinberar stofnanir og aðra aðila utan skólans og eru varin fyrir dómnefnd tveggja kennara ásamt hópi nemenda.

Nám til grunngráðu tekur yfirleitt þrjú ár. Á Bifröst gefst nemendum í staðnámi kostur á að ljúka námi á skemmri tíma þar sem sumarnám er hluti reglulegs náms. Nemendur geta því lokið 80 ECTS einingum á ári í stað 60. Þannig er hægt að ljúka námskeiðum að mestu leyti á tveimur árum, en á síðustu önninni skrifa nemendur lokaritgerð auk þess að ljúka einingum sem eftir eru með starfsþjálfun eða valnámskeiðum. Náminu má því ljúka á tveimur og hálfu ári. Fjarnám í viðskiptafræði er skipulagt sem hefðbundið þriggja ára nám. Nemendum í fjarnámi býðst þó einnig að taka sumarönn í staðnámi.

Til að geta innritast í námið þurfa nemendur að hafa lokið stúdentsprófi eða sambærilegri menntun t.d. úr Háskólagátt Háskólans á Bifröst, frumgreinadeild Háskólans á Bifröst eða öðru undirbúningsnámi fyrir háskólanám.

Þó formlegum umsóknarfresti sé nú lokið eru allar umsóknir sem berast skoðaðar.

Sækja um BS í viðskiptafræði í staðnámi:

Sækja um BS í viðskiptafræði í fjarnámi:

Sækja um BS í viðskiptafræði með áherslu á markaðssamskipti:

Sækja um BS í viðskiptafræði með áherslu á ferðaþjónustu: