Meistaranám í fjármála- og bankastarfsemi
(Fjarnám og sumarnám)
Meistaranám í fjármálum og bankastarfsemi er sniðið að þörfum þeirra sem hafa áhuga á, eða starfa í fjármálafyrirtækjum eða við fjármál í öðrum fyrirtækjum hér á landi eða erlendis. Námið er skipulagt út frá þörfum markaðarins sem og út frá því besta sem gerist í erlendum háskólum og er miðað við að það standist alþjóðlegar kröfur sem gerðar eru til slíks náms.
Markmiðið með náminu er að mennta áhugasamt fólk sem öðlast mun djúpstæða þekkingu á þeim vandamálum sem upp geta komið og þá sérstaklega að úrlausnum mála í gjörbreyttu umhverfi íslenskra fjármálafyrirtækja. Sérstök áhersla verður lögð á þætti eins og útlán banka, aðferðafræði lánveitinga og innheimtu auk innra eftirlits og reglugerða opinberra aðila, sem er nýjung sem Bifröst býður upp á.
- Námið er í stöðugri endurskoðun og tekur því mið af þörf atvinnulífsins og samfélagsins alls
- Það veitir traustan fræðilegan grunn í fjármálum og bankastarfsemi
- Það gefur mikla innsýn í þekkingu og reynslu þeirra sem starfað hafa á þessum markaði á mismunandi sviðum.
- Kennsluaðferðir eru frábrugðnar því sem þekkist annars staðar þar sem blandað er saman fjarnámi og staðnámi. Staðnámið er kennt á sumrin.
- Raunhæf verkefni þar sem tekið er á verkefnum sem upp kunna að koma hverju sinni, bæði í einstaklings- og hópaverkefnum
- Hægt er að taka hluta námsins við erlendan samstarfsskóla
- Kennarar eru innlendir og erlendir sérfræðingar
Uppbygging námsins er með þeim hætti að það hentar mjög vel einstaklingum sem eru nú þegar við störf þar sem námið er kennt í fjarnámi og á sumarmisserum. Nemendur geta valið hvort þeir taka 10 -12 námskeið og ritgerð eða taki 15 námskeið og sleppi ritgerð.
